البنت مش زي الولد-ايمان سامي

من البداية كده أى حد من بتوع حقوق المرأة والكلام ده ياريت ميقراش الكلام الجاى علشان منزعلش مع بعض .

طول عمرى بسمع أغنية سعاد حسنى البنت زى الولد .. البنت زى الولد .

طلعنا لقينا التليفزيون كل شوية يجيب إعلانات البنت زى الولد و أنا بنت مصرية شرقية عصرية ..

ندخل المدارس يفهمونا كده .. نقرا الجرايد نلاقى كده .. لحد ما صدقنا أن البنت زى الولد ..

خلاص كلنا تشبعنا بالفكرة دى .. وبم إن بنات كتير و هى صغيرة كانت عاوزة تبأه ولاد لكن حيعملوا إيه أدى الله و أدى حكمته ما صدقوا بأه لقوا موضوع البنت زى الولد ده علشان يخرجوا العقد الدفينة جواهم وبدأوا يتحولوا لحاجه كلنا بنعانى منها وهى الاسترجال .

و كل واحدة من دول تقف و تتخن ف صوتها و تقول البنت زى الولد .. أنت فاكرنى إيه أنا زيى زيك ...

أرجعلكم أنا بأه .. طول عمرى الجملة دى مضايقانى .. يعنى إيه إن شاء الله البنت زى الولد .. لأ بأه أنا مش زى الولد .. أنا بنوته جميلة مش زى الولاد الوحشين دول .

فى حفلات المدرسة بتاعة الابتدائى كنا لازم نغنى الأغنية دى بس مكنتش ببأه مقتنعة أنا لابسه فستان بكرانيش و مسرحة شعرى ديل حصان .. أنا كده زى الولد ؟؟

الولاد بتلبس بدل وأنا لابسه فستان يبأه إزاى بأه أنا زيهم ؟؟؟؟

كبرت بأه فهمت إن سعاد حسنى كانت قاصدة من الأغنية دى إن البنت متساوية مع الولد فى الحقوق و الواجبات .. تتعلم زيه و تشتغل زيه وهكذا .. فارتحت شوية و قلت إذا كان كده ماشى .. بس بعد إيه .... بنات كتير فهمت الموضوع غلط و محدش قدر يخرج الفكرة الغلط دى من دماغها .

وقعدوا ينخوروا فى عقل المجتمع لحد ما بقينا على الحال إللى إحنا فيه ده ..

كل واحده من دول بأه عندها حقد دفين لكل الرجالة .. تبص للراجل من دول وعنيها بتطق شرار .. إنت فاكرنى إيه لا دى البنت زى الولد و أنا زيى زيك .. وتبص تلاقيها تتخانق معاه وهى بتنط فى المكروباص وتشده من هدومه إيه أنا إللى حركب الأول ولا علشان راجل يعنى حتركب قبلى ..

و بقوا يطلعوا فى التليفوزيون يسرسعوا .. ليه الست تطبخ و الراجل لأ .. ليه تستحمل جوزها وهو راجع من الشغل تعبان و هو مستحملهاش .. ليه تحمى العيال و هو يتفرج على الماتش ؟؟؟؟؟

لأ إنت زيك زيه لازم يدخل المطبخ معاكى لازم ينشر الغسيل ولا يعنى أنتى تقعى من الدور العاشر و هو يتجوز واحدة تانية برده تنشر الغسيل ؟؟

وتلاقى الستات الغلابة يشوفوا الكلام ده ويقولوا آه صحيح ده إللى لازم يحصل و تروح الست من دول تتخانق مع جوزها إللى بيقرا الجرنال قوم انشر الغسيل .. غسيل إيه يا ولية إللى أنشره أنا الراجل .. تقوم هى قايلة الكلمة إياها .. الست زى الراجل .

وتقوم الخناقات ويطلعوا بأه عيال الست و الراجل دول معقدين من الستات و الجرالة و كل واحد مش طايق الست إللى عاملة نفسها راجل و البنات طالعة راضعة كره الرجالة .

و تطلع كل بنت بأه عاوزة شرط أساسى فى الراجل إللى حتتجوزه أنه يكون بيطبخ وبينشر الغسيل لأنها مش فاضية للحاجات دى لأنها مشتركه فى جمعيات نسائية لخراب البيوت المتهنية .. يقوم الشاب من دول واخداه الجلالة ويقول لأ طبعا أنا راجل .. تبص لضوافرها و تقله سورى أنت متخلف أنت متعرفش إن البنت زى الولد ؟؟

و طبعا الجملتين دول بيحصلوا مع كل عريس يتقدم للشملولة دى .. وتفضل تتأمر لحد ما تلاقى نفسها فى عين العدو وصل عمرها 35 وهى لسه قاعدة جنب أمها اللى بوزت دماغها أصلا و تلاقيها بأه باعته لصفحة أريد عريسا و مستعدة تعمل أى حاجه علشان أى واحد و السلام يرضى بيها .. مستعدة دلوأتى بس تغسل و تطبخ و تنشر الغسيل كمان ..

لذلك أنا بقولها بعلو الصوت و الله العظيم البنت حاجه و الولد حاجة ..

البنت يعنى الحنان و الضحكة الحلوة .. يعنى اللى بتستحمل حاجات كتير علشان المركب تمشى و العيال تتربى ..

والولد يعنى القوة .. يعنى اللى لازم تطلع عينه ويتعب و يشقى علشان برده المركب تمشى و العيال تتربى ..

وأنا بقلهالكم أهه .- على الرغم من إنى معنستش لسه – إلا أنى بطبخ و أغسل وعلى الرغم من أنى بخاف من المرتفعات إلا أنى بنشر الغسيل