خاص - البوابة
في 2 نيسان/ابريل 2002، اقتحمت القوات الاسرائيلية التي كانت تشن عملية "السور الواقي" في الضفة الغربية، مقر جهاز الامن الوقائي في بيتونيا القريبة من رام الله، واعتقلت 8 نشطاء فلسطينيين بينهم 6 من حركة حماس كانوا محتجزين داخل المقر.
وقالت مصادر في حينها إن المعتقلين اتصلوا من هاتف خلوي قبيل تسليمهم, بالقيادي في حماس عبد العزيز الرنتيسي في غزة وأعلموه أن قائد الامن الوقائي جبريل الرجوب سحب منهم أسلحتهم, ومنعهم من الدفاع عن أنفسهم.
وفي اليوم التالي لاعتقالهم، توعدت حماس بالانتقام من الرجوب بعدما اتهمته بانه قام بتسليم عناصرها للقوات الاسرائيلية عن سابق تواطؤ وفي اطار "صفقة مشبوهة".
وخشية من ردة الفعل، اتصل الرجوب مع احد قادة حماس في الضفة الغربية وطلب منه ان يؤمن اتصالا بينه وقيادة الحركة في غزة، عساه يبرئ نفسه من التهمة ويبعد الخطر عن نفسه.
وكان للرجوب ما اراد، حيث قام قيادي حماس في اريحا في الضفة الغربية شاكر عماره بابلاغ الرنتيسي برغبة العقيد في التحدث اليه وتوضيح موقفه مما جرى خلال حصار المقر.
وبالفعل، قام الرنتيسي بالاتصال بالرجوب عبر الرقم الذي اعطاه له عماره.
لكن نص المكالمة التي استغرقت نحو 13 دقيقة، لم يكتب لها ان تظل طي الكتمان، حيث رصدتها اسرائيل وقامت بتسريب محتواها.
وفي الاتصال الذي اطلعت "البوابة" على نصه، جاهد الرجوب لنفى التهمة عن نفسه، والقى بالمسؤولية في اعتقال النشطاء على قادة فتح ومسؤولي السلطة الفلسطينية وفي مقدمتهم الرئيس الراحل ياسر عرفات.
وتاليا نص المكالمة التي جرت بين الرجوب والرنتيسي الذي اغتالته اسرائيل في غارة جوية في غزة العام الماضي:
الرجوب: الو
الرنتيسي: الو السلام عليكم
الرجوب: اهلا وسهلا
الرنتيسي: كيف الحال
الرجوب: ايش اخبارك
الرنتيسي: والله الحمد لله، امبارح اتصل..الو..
الرجوب: يا دكتور الو
الرنتيسي: ايوه ايوه سامعك
الرجوب: اه واضح الصوت. كيف اخبارك
الرنتيسي: والله امبارح اتصل في الاخ شاكر
الرجوب: نعم
الرنتيسي: واعطاني التلفون وحكالي انك يعني بدك تتكلم معانا، فقلنا اهلا وسهلا
الرجوب: يعني شوف يا دكتور، يعني اولا الوضع انت بتعرف انو الوضع صعب والوضع مش وكت يعني لا ملامات ولا وكت عتاب. وانت يعني فيه ثلاث قضايا لازم تستوعبها.
القضية الاولى انو انا لا اتضايق من حماس ما دامت بتحكي سياسة ومن حقكوا انكوا تدافعوا عن حالكو ومن حقكوا انكوا تشرحونا باي طريقة انتو بدكم اياها ما دمنا احنا كلياتنا بنحكي من موقع التزامنا بقضيتنا الوطنية..و..الو
الرنتيسي: ايوه معاك معاك
الرجوب: واحنا بتعرف بالعمل الوطني ما حدا بزايد على حدا يعني، وما حدا بقدر يدعي انو فلسطين لابوه، ومش لانو احنا السلطة في النهاية احنا كويسين وانتو مش كويسين. هساعيات هاي قضية سياسية وما فش نقاش فيها بالنسبة النا.
الموضوع الثاني، انو انا يا دكتور يعني لا اتهرب من مسؤولياتي، يعني اذا كان فيه هناك عندي خلل يعني انا شخصيا بقبل..ملزم اقبل بالمساءلة..
الرنتيسي: نعم
الرجوب: المسألة الثالثة انو انا ولا مرة كنت يعني بصنع قرار. انا ضابط تنفيذي. ومن هون أي محاكمة يعني بدها تصير او مساءلة بدها تصير للي حصل، يجب انها تكون من هذا الموقع.
وانا حقيقة يعني حبيت اني احكي معك شخصيا وقلت لما حكى معي الاخ شاكر..لانوا انت اللي طلعت وتصدرت الموضوع، فبقوللي الزلمة انحكى انو جماعتكوا قالوا انو هيك هيك، فانا يعني حاب احط الصورة قدامك وانت بتنقلها للشيخ عندكو ولكل الاخوان.
شوف يا دكتور..
الرنتيسي: نعم
الرجوب: اولا انا شخصيا لم احجز احدا بناء على رغبة شخصية، وكان هناك قرار سياسي. واي واحد بقولكوا انو فيه قرار سياسي باخلاء سراح المعتقلين هو كذاب. لحد اخر لحظة، وانت بتعرف انا المشكلة اللي صارت معي عشان الخليل وعشان المساجين، بتعرف فيها والا بتعرفش؟
الرنتيسي: سمعت فيها آ
الرجوب: نعم انا بؤللك صارت معي مشكلة. في الوقت المناسب انا راح احكي ايش صار معاي وليش صار معاي..
الرنتيسي: نعم نعم
الرجوب: اثنين، احنا قبل ما يصير الاجتياح بساعة، كنا في اجتماع كان فيه 12 واحد، منهم محمد دحلان ومنهم خالد سلام ومنهم حكم بلعاوي ومنهم ياسر عبد ربه. ابو مازن. اكرم هنية. نبيل عمرو. الحاج اسماعين، يعني كل القيادة اللي بتخطر في بالك.
وصدرت التعليمات النا نعتقل المزيد، وانا طلب مني اجيب كمان عشرة. فسألتوا قلتلوا يا ابو عمار انت ظمنان الوضع تبعي، قاللي يا بني ما حدا بيقرب عليك. قلتله عندك ظمانات؟ قللي انا عندي ظمانات. قلتلوا اوكي.
ومع كل ذلك انا ما قبلتش لانو انا كان عندي..يعني بتعرف ايش يعني احنا قاعدين شايفين كيف شو بدهم يقولوا عنا حماس..؟
الرنتيسي: نعم نعم
الرجوب: وهاذا الكلام نقل كمان للاخوان في غزة. هاي المجايدة موجود وامين موجود والطيب موجود..انو يا اخوان بدنا.. اعتقادا من اخوانا انو مزيدا من الاعتقالات بتحمينا يعني انا بكون معك واضح وصادق يعني..
الرنتيسي: صحيح
الرجوب: اوكي؟ هساعيات هذا فيما يخص الموضوع هذا. الاسرائيليين لما دخلوا يوم الخميس بالليل انت عارف الجمعة الصبح هم حاصروا مقر الامن الوقائي زي ما حاصروا مقر ابو عمار..
الرنتيسي: نعم
الرجوب: انا ما عنديش جيش احمر يا دكتور، انا بتعرف جهاز امن عندي ستين خمسة وستين عسكري..هسع كان عندنا مجموعة من المساجين. الاخوان قالولهم يا اخوان اللي فيكو بيحب يروّح الله يسهل عليه، واللي بحب يظل زيّو زيّنا.
فيه اثنين من الاخوان طلعوا، واحد فيهم غاب 24 ساعة ورجع والثاني ما رجعش، الى الان الله سبحانه وتعالى ان شاء الله يعني بيحميه..
الرنتيسي: نعم نعم
الرجوب: هسّاعيّات هذول الاخوان اللي كانوا عندنا، انا بقولك هذول امانة عندنا. وانت تعرف يا دكتور احنا لو بدنا نسلمهم كان يا خوي تجنبنا القصف وتجنبنا والا لأ؟
الرنتيسي: صحيح
الرجوب: اقولك شي واحد، انا وانا بقولك بالحرف وانا ظابط مش شو اسمه بجوز انت ما بتعرفني وصدقني انا مقدام يا دكتور..
الرنتيسي: الله يحييك
الرجوب: انا يعني. انا لو كنت في المقر بقدر اقولك انو يعني بتقدر انت تتهمني اني انا جوبنت. انا مش في المقر. هسعّ الظباط اللي عندي قالولي يا اخ ابو رامي اكثر من هيك بنتحملش..
الرنتيسي: آه. صحيح. صحيح
الرجوب: احنا هاي طاقتنا. هساعيات حتى الاخ اللي من عندكوا اللي هو حجو اسمه ما بعرف شي قاللهم يا اخوان انا بالعربي انا بديش اموت انا بعرف احنا رايحين على عسقلان ولكن احنا ما بدناش نموت. طبعا الرجل كانت عندو مرته واولاده. اذا كان ما بتعرف يعني انا بقولك.
الرنتيسي: نعم نعم
الرجوب: شايف كيف. هساعيات حصل اللي حصل. انا يوم السبت اخوي محمد دحلان وهو موجود نقللي الظمانات التالية باسم بندر بن سلطان باسم كولن باول باسم ديك تشيني وو..الى اخره انو لن يقتحم مقر الامن الوقائي وانا نقلت هاي الظمانات للشباب.
وصائب عريقات نقللي نفس الماسيج..هساعيات هاي مؤامرة بدهم يدمروني، بدهم يدمروا جهازي بدهم كذا، طبعا انا باسف انو انتوا اول ناس دقيتوا طبعا بعد ما سمعتوا من جماعتنا. انا بقولك اذا انا زلمة اسرائيل وبسلمهم ناس يعني زي هاي قصة صوريف يعني انا بأمل تسقطها من وعيك والى الابد..
شايف كيف؟ يا دكتور لو انو يعني انا زلمتهم، بتعرف بقولوا عني بطخ علينا. بقولوا عني بعمل متفجرات. بقولوا عني. بتعرف بهاجموني. مطلوب. مش بيجوا بوخذوا المساجين من عندي وبطلعوني جاسوس ابن شـ.. والا لأ؟
الرنتيسي: صحيح صحيح
الرجوب: فيا صديقي العزيز (..) انا بقولك بكل امانة واخلاص هذا ما حصل، وانا بأمل انك تنقلوا عند الاخوان.
الرنتيسي: ان شاء الله ان شاء الله
الرجوب: وانا شخصيا جاهز لكل المساءلات القانونية والوطنية والاخلاقية وانا لن اتهرب من مسؤولياتي. اصلا مش انا اللي سجنتهم. وانا بقولك الواحد يا رجل انا عيب الواحد هساع يصير يحكي. انا اقسم بالله العظيم واحد اسمو عبدالله بتعرفه انت
الرنتيسي: آه
الرجوب: انا زحلقته قبل هيك اقسم بالله سب ابوي مليون مرة
الرنتيسي: نعم
الرجوب: انو كيف هذا طلع وكيف راح وكيف اجا وكيف مش عارف ايش. هساع قلنا خللي هالخمسة ستي عندنا نطقطق عليهم بنحمي حالنا فيهم. ولكن لا حمينا حالنا ولا حميناهم
الرنتيسي: ما هو يعني انت لو شفت لقاء محمد رشيد قبل ما يعملوا معاي اللقاء
الرجوب: لأ انا سمعت. انا ما شفتوش
الرنتيسي: آ..انا شفته
الرجوب: انا ما شفتوش. شو قال هو بالظبط؟
الرنتيسي: هو يعني بقول انو هذي بتحمل مسؤوليتها العقيد جبريل الرجوب، واحنا قلنا انو ما يضلش حد في المواقع خالص من المعتقلين. تخلى تماما. هذا حكاه عالجزيرة. ما حكالك عنو جابر؟
الرجوب: يعني انا وحياة ابوي وابوك وبدم كل شهيد
الرنتسي: صادق صادق
الرجوب: وشرف خواتي وخواتك يا رجل انا بدي اقولك يا دكتور معقول انا بخلي بنات في المقر؟ يا رجل معقول؟
الرنتيسي: صادق صادق
الرجوب: يعني انا لو ما جابوليش ظمانات هم محمد رشيد ومحمد دحلان..لو ما جابولي ظمانات هم. فاهم علي؟ انا بخلي بنات في المقر؟ انا بخلي ظباط في المقر؟ بخلي مساجين في المقر؟ طب هذا حجه لو مرته شو بسترني معاكو يا تاعون حماس؟ لو مرته وابنو انقتلوا عندي؟
الرنتيسي: نعم مشكلة
الرجوب: والا مش صحيح؟
الرنتيسي: صحيح صحيح
الرجوب: انا شو بدو يسترني مع اهل البنات اللي كانن موجودات في المقر؟ انا عندي اوتيل داخل المقر؟ يا اخي بفظيه بفظي الناس بخليلي عشرة خمسطاشر عسكري
الرنتيسي: نعم
الرجوب: وانا بقولك قعدوا اربع ايام ما عندهم اكل واخر 18 ساعة بتعرف ما كانش عندهم ميه.
الرنتيسي: آه
الرجوب: انا بقولك هذا اللي حصل ومش محمد رشيد هو اللي بيجي يفتي للشعب الفلسطيني ولا محمد رشيد هو لسان حال ياسر عرفات، وابو عمار يتحمل المسؤولية بشكل شخصي انو بترك واحد تافه زي هذا انو يحكي باسمه يا
الرنتيسي: نعم
الرجوب: اما انا اذا انتهت انا بقولك هذا الحكي اللي حكيتلك اياه انت بتقدر تحكيه على لساني. كويس؟ وبتقدر وانا حقول وانا حقف واقول وانا قلت حتى اذا سمعت ردي عليك انا قلت انو اخوانا في حماس من حقهم يزعلوا
الرنتيسي: صح صح
الرجوب: سمعتني والا ما سمعتنيش؟
الرنتيسي: لا مزبوط مزبوط
الرجوب: انا بقولك ولا بتضايق انو انتوا اما مش انا المسؤول يا عمي سلطة ايش اللي.. انا باقي فاتح حبس على حسابي. هسّاعيات بتعرف محمد رشيد بدو يبري المستوى السياسي انو هاي مسؤولية جبريل الرجوب او محمد دحلان. لا مش صحيح يا عمي.
وانا بقولك هذا الاجتماع هاي امين عندي موجود عندك في غزة بتقدر تحكي معه، هو والمجايدة طلعوا من هون عشان يعتقلوا المزيد. وبنفس الوقت احنا كنا موجودين هون وصدرت تعليمات الي قدامهم كلهم.
وهيني قلتلك كل الناس وانا متأكد ياسر عبد ربه عندو ظمير وابو مازن عندو ظمير وحكم بلعاوي عندو ظمير وكان محمد رشيد قاعد ومحمد دحلان قاعدين. اول على التالي الناس رح تحكي. بتعرف نبيل عمرو موجود..
الرنتيسي: نعم
الرجوب: انو يا جبريل على الاقل لازم تجيبلي عشرة. قلتله يا عمي يعني انتو بتفكروا الناس انا اطقطقلك على مين؟
… صار اللي يقولك جيبلي جمال الطويل واللي صار يقولك جيبلي شو اسمه هذا الشيخ حسن، انا قلتلهم هذا الشيخ حسن والله العالم كلها بتقدرش تقدم عليه انا الشيخ حسن والشيخ شاكر بقربش عليهمالرنتيسي: نعم
الرجوب: فانا بقولك يعني انا بتعرف مش بدي ابرر موقفي، انا بالمحصلة النهائية انا جزء من هاي المؤسسة وانا اتحمل المسؤولية زيي زي أي واحد فيهم
الرنتيسي: نعم نعم
الرجوب: وانا يعني صدقني صدقني وبدم كل شهيد اني كنت اتمنى لو اني كنت هناك ومتت. لكن وبعدين انا يا دكتور انا بقدرش اقول للناس اللي هناك موتوا. انا بقدر اموّت حالي، بس انا..قالولي خلص هاي طاقتنا احنا اكثر من هيك بنتحملش.
الرنتيسي: نعم نعم
الرجوب: فيعني هذا اللي انا فعلا انا..وانا بشكرك انك اتصلت وسلم على الشيخ..
الرنتيسي: الله يسلمك، يعني احنا ان شاء الله يعني الحق هو اللي بندور عليه،
الرجوب: يا دكتور اسمع مني انتوا لازم تفكروا صح
الرنتيسي: نعم
الرجوب: انا زلمة مش زلمة اسرائيل واميركا، ما تغلطوش، ما تغلطوش في الحسبة
الرنتيسي: نعم نعم
الرجوب: عرفت كيف؟ ما تغلطوش في الحسبة. انا مش بدي هساع ابرر لانو الوضع صعب. انا بقولك الحكي بعد شهر بعد شهرين بعد سنة. وانتوا لازم تستوعبوا. اللي حصل في مقري انا بقولك هو رسالة لكل العالم يم.
هم كانوا بقولك جبرين جبرين. انا ابو عمار قللي انا متاكد مش رح يقربوا عليك..انت بتعرف المرة اللي فاتت اكم واحد كان عندي يا دكتور؟
الرنتيسي: نعم
الرجوب: من عندك ومن عند غيرك قديش فكرك؟
الرنتيسي: والله اما انا عارف
الرجوب: يعني اعطيلك رقم
الرنتيسي: 100؟
الرجوب: 500
الرنتيسي: الله اكبر!
الرجوب: مش مساجين هه،
الرنتيسي: اه اه اه
الرجوب: يعني ما بين لاجئ وما بين مختفي يعني من حماس ومن فتح ومن الاجهزة ومن الشعبية..كان عندي 500 واحد والمرتب تبعي 500 يعني كان عندي الف واحد في المقر
الرنتيسي: نعم نعم
الرجوب: اوكي؟ فـ هالساعيات الحمد لله اللي المرة هذي اجت عالسريع وما كانش غير هالست شباب اللي هم واحنا طبعا اعتقلولي يعني فيه عندي مجموعة من ضباطي برضو كمان مطلوبين
الرنتيسي: نعم نعم
الرجوب: ولكن بالمحصلة النهائية انا شخصيا يعني زي ما قلتلك انا اتحمل المسؤولية في السياق اللي انا حكيتو وانا حتى لما شو اسمه فيقوني وانا حكيت قلتلهم يا عمي انا بالنسبة لاخوانا في حماس من حقهم يزعلوا، وانا بقولك من حقكم تزعلوا.
وانا هذا الحكي ما قبلت احكيه بعديها في الشو اسمه لانو ابو عمار قال رجاء خليك يعني اسكت وكذا، قلتله انا حسكت
الرنتيسي: بارك الله فيك
الرجوب: وبعدين يا اخوي ليش هو ما كان ما هو هيهم ما ظلوا يطلعوا تا وصلوله باب مقره طب وشو يعني بالنسبة لما يحكي محمد رشيد هيك؟ معلش وطنيا يعني: هساع الخمس ست شباب اللي هم اولادكو واولادنا هم اهم والا تبعين زئيفي واحمد سعدات؟
الرنتيسي: صحيح
الرجوب: طب ليش ما روحهم يا اخوي ما دام فيه قرار زي هيك؟ ليش ما خلاهم يفلتوا؟
الرنتيسي: صدقت صح صح
الرجوب: والا مش صحيح؟
الرنتيسي: لا صحيح
الرجوب: فاحنا انا بلاش اكون ضحيه لانو انا فعلا يعني ممم يعني بالمحصلة النهائية انا بقولك انو هاي اللي حصل وعلى كل حال النا حديث وانت دايما احكي معي
الرنتيسي: بارك الله فيك
الرجوب: وانا مرة ثانية انا بشكرك انك اتصلت وسلم على الشيخ وسلم على الاخوان
الرنتيسي: يوصل ان شاء الله
الرجوب: وان شاء الله الله بينجينا كلياتنا وبنظل على اتصال
الرنتيسي: يا رب يا رب
الرجوب: واي شي بدك اياه احكي انت ما تتردد تحكي وتسأل انا ما عندي مشكلة وانا زلمة زي ما قلتلك يعني لا احنا احرص منكو ولا انتوا احرص منا
الرنتيسي: الله يبارك فيك
الرجوب: اهلين دكتور
الرنتيسي: حياك الله وشكرا شكرا
الرجوب: اهلين
