شهدت المنطقة المحيطة بوزارة الدفاع المصرية اشتباكات بين متظاهرين والبلطجية، وكان المتظاهرون من مؤيدي مرشح الرئاسة السلفي، حازم ابواسماعيل، معتصمين في محيط الوزارة منذ السبت الماضي، بعد أن أعلنت اللجنة العليا للانتخابات الرئاسية استبعاده من السباق الرئاسي الشهر المقبل. وشهدت هذه الاشتباكات وقوع 11 قتيلا حتى اللحظة، كتب المدون باسم زكريا السمرجي عن شهادته عن الأحداث:
"امبارح بالليل طبعا زي معظم الناس معرفتش أنام وصحيت الصبح مقدرتش أعمل أي حاجة غير إني أروح على الاعتصام. نزلت محطة مترو كوبري القبة ومشيت الخليفة المأمون كله الدنيا أمان والمواصلات ماشية ومفيش أي حاجة لحد ما وصلت للاعتصام عند ميدان العباسية برضه الدنيا أمان والعدد قليل جدا في الاعتصام، وأنا ضعيف في تقدير الأعداد لكن ما أظنّش إنهم يعدّوا مئات .. وصحيح مشفتش ولا يافطة لحازم أبو إسماعيل لكن أغلب المعتصمين سلفيين وده طبعا مش معناه إنهم يُعتدى عليهم أو يُسلبوا حق من حقوقهم بأي شكل من الأشكال.المهم، عديت الاعتصام ولاقيت ناس من ناحيتنا محتلة الكوبري مأمّناه (وأنا مش هاقول ثوار وبلطجية .. هاقول من ناحيتنا ومن ناحيتهم) وساحة المعركة الأساسية هي موقف أوتوبيس العباسية .. الملاحظة الأساسية هي إن الناس اللي من ناحيتنا والناس اللي من ناحيتهم شبه بعض، الفرق بس إن ناحيتنا في سلفيين كتير .. السلاح الأساسي في المعركة الطوب والمولوتوف، وشفت اتنين من الناحية التانية معاهم فِرَد خرطوش .. واللي بيحصل كالآتي: احنا محتلين ساحة موقف الأوتوبيسات كله تقريبا معظم الوقت وهم واخدين البيوت في ضهرهم والطوب والمولوتوف شغال، وفي كذا فرشة خضار اتحرقت في الموقف من المولوتوف بتاعنا، وكل شوية العيلين اللي معاهم خرطوش يضربوا علينا فنرجع لنص الموقف أو نرجع لحد ما نجيبهم عند الكوبري فالناس اللي واقفة فوق الكوبري تحدف عليهم من فوق فيرجعوا ونتقدم تاني .. وهكذا، يتقدموا فنرجع ونتقدم فيرجعوا، في معركة متكافئة لأقصى حد .. مشفتش إصابات عندهم لكن شفت عندنا إصابات أغلبها من الطوب""
ويضيف :
"الخلاصة: أنا أول مرة أبقى متلخبط لأن اللي بيدبّوا من الناحيتين زي ما قلت شبه بعض .. شكلهم مدني وماستبعدش يكون في بلطجية في الناحيتين فالموقف الأخلاقي فعلا صعب وهي مش هتتحل إلا بإن الناس ترجع لمكان الاعتصام وماتخرجش منه تمهيدا لفضّه لأن الموضوع قلب لتار مع أهالي العباسية .. وسمعت كلام إن أهالي العباسية بيقولوا احنا مش **لات علشان تيجوا تضربوا فينا، ماتضربوا في اللي بيضربوكوا (ويقصدوا الجيش والشرطة)آخر حاجة: محدش يحمّس الناس إنها تنزل تنصر اخواتنا اللي بينضربوا هناك لأن اللي بيضربوا برضه شبه اخواتنا اللي بينضربوا واحتمال يكون منهم إصابات وشهداء برضه أنا معرفش .. اللي عايز ينزل ينزل بمبادرة كبيرة لمحاولة تخليص الناس وإرجاعهمالحاجة اللي بعد الأخيرة: الدم اللي سال متحمل جزء كبير من مسؤوليته حازم أبو إسماعيل ... أنا أتقرب إلى الله ببغضي هذا "الرجل"
أما في موقع التواصل الاجتماعي فكانت التعليقات:
@belalfadl وهو حازم اللي رافض الإعتصام دلوقتي ماكتبش على حسابه على الفيس بوك يقول هو ده اللي بيحصل لما الناس تيأس ماقالش ليه في نفس الكلام إنه رافضه
@Manshy_007 المشكلة إن فيه ناس ماتت من العباسية، يعني هتبقى فيه مجزرة لما يتدفنوا وتتشيع جنازتهم .. وكل اللي بيحصل دلوقتي جزء بسيط من اللي هيحصل بعدين
@mohamedwaked الداخلية اعلنت انها قبضت على عدد من افراد حملة حازمون معهم سلاح يشمل عدد من النبل وبعض البلي (غالبا علشان النبل)...الكلام ده بجد على فكرة
@MaLek اختياري الشخصي اللي شايفه اقرب للصح, ومش بدعو حد يتبناه او لا, هو عدم النزول, وعدم مناقشة الاعتصام اصلا
@seksek احنا الجيش وعايزين نجيب بلطجية يفضوا الاعتصام, تعالوا نديهم اكل و نسيب العلب هناك و نديهم قنابل مسيلة للدموع عشان احنا متخلفين, حتساعدونا؟
@imanhaust والاذكياء اللي بيسالوا حازم مانزلش ليه!!؟ عشان دوره خلص ف الحلقه دي بمرواح الاف من اتباعه فجر السبت وعمليه احلال الطعم الغبي محلها
@nserhan "متحدث باسم حملة حازم أبواسماعيل بيقول احنا التزمنا تماما بقرار اللجنة، و المعتصمين لا يتبعوننا، والشيخ قال للناس روحوا!" الوساخة بلا حدود
@sabrykhaled اقتلني أنا وكل صحابي يمكن ترتاح .. يمكن الحل في موتنا .. ارمينا في الزبالة يمكن تفرح بلعبتك
شاركنا برأيك في التعليقات: برأيك من المستفيد من أحداث وزارة الدفاع المصرية، وهل يتحمل الشيخ حازم أبو اسماعيل جزءاً من المسؤولية؟.
لمتابعة أحدث جولاتنا في المدونات العربية عبر صفحتنا على موقع فايسبوك، اضغط هنا وابق على اطلاعٍ بأحدث المستجدات، كما يمكنك متابعتنا على تويتر بالضغط هنا.
