حوار عادي في نهار رمضاني

سعيد قاعد في الشغل منهمك ومهموم.. فجأة يرن الهاتف.. يرد بصوت ضعيف: نعم..

الزوجة على الهاتف: مرحبا يا سعيد..

سعيد وقد عرفها.. بفتور: اهلللللا..

الزوجة: جيبلنا معك بقدونس وبندورة وبصل اخضر.

 سعيد: طيب

الزوجة: شو مالك مش قادر تحكي..

سعيد: ولا شي

الزوجة: وجيبلنا قطايف.. تنساش من عند قطايفينو..

سعيد: طيب

الزوجة: اوعى تنسى وتجيب من محل ثاني.. انا ما بحب الا قطايف قطايفينو..

سعيد: حاضر ..

الزوجة: وفخذة اللحمة.. شوف.. خلي اللحام يشيل شوية من الضهر وحط عليهم لحمة عجل، وخليه يفرهم نص كفتة ونص فرمة خشنة.

سعيد: منيح

الزوجة: شو مالك بتجاوب اجوبة قصيرة..

سعيد: ابدا.. كملي..

الزوجة: وطلع شوية لحمة من الفخذة اعملها راس عصفور..

سعيد: فهمت

الزوجة: شو هاظ.. شو فهمت؟

 سعيد: ليش انت لسه ما خلصتي؟

الزوجة: لا.. والباقي اعمله شقف..

سعيد: ماشي..

الزوجة: بس شقف كبيرة مش زي المرة الماضية والله انفضحت قدام المعازيم..

سعيد: انا ما انفضحت..

الزوجة: شو حضرتك بتنكت.. ما هي كانت فضيحة وعليها شهود.

سعيد: طيب.. فضيحة.. اشي ثاني.

الزوجة: شو قصتك من سيعت ما حكيت معك بتجاوب اجوبة قصيرة كانك  مستقلع مني.

سعيد: لا ابدا.. بس انا في الشغل..

الزوجة: اللي بسمعك بقول الشغل مقطع بعضه!

سعيد: يا ستي.. انا مشغول.. والله مشغول.. شو قصتك اليوم.. حلي عني.

 الزوجة: ما بدي احل عنك.. بعدين شو مفكر حالك لحالك صايم.. أي كلنا صايمين.

 سعيد: بعرف..

الزوجة: طيب حسن الفاظك.. واحكي عدل.. لا تنس الاغراض.

باي..

" يقال على عهدة الراوي ان الزوج افطر هذا اليوم"