تعلق مجداوية من مصر على خبر أوردته صحيفة الغارديان البريطانية عن ثروة عائلة الرئيس المصري. تخاطب مجدلاوية المواطن المصري قائلة:
"وابكي يا أهبل يا عبيط ياللي بكيت على فرعون وصدقته إنه بيحب الوطن واعرف إنه سرق منك ومن الوطن
70 مليار دولار
والي مش عارف يساووا كام دول بالجنية يضرب نفسه خمس تقلام يبقى المجموع
350 مليار جني يعني جنيه".
وتتابع:
"وابكي يا أهبل يا عبيط وبرياله على كل يوم من 30 سنة فاتوا عليك وكل يوم بتتقلب وبتتنهب في حب مصر
وابكي يا أهبل ويا عبيط وبرياله على كل واحد مات من غير علاج أو سرق أو قتل أو كفر عشان معهوش حتى الكفاف
وابكي على 40% تحت خط الفقر مش لاقين حتى دولار".
وتعاتب من يتمسكون ببقاء مبارك رئيسا لمصر:
"وابكي على يوم ميلادك ويوم مماتك وانت عايش ذليل مطاطي بتنضرب على قفاك كل ثانية في عمر أجلك ومن أجلك أنت بيضربوك بالقفا ليل نهار !!
وابكي يا اهبل يا عبيط وبرياله وانت ماسك بتلابيبه وتقوله متسبنيش يا فرعوني الوفي المحب المخلص للوطن يا كبير يا بويا وأمي وخالتي وكل عليتي ورمز بلدي يا طيار".
صاحبة مدونة شمس النهار تعلق على نفس الخبر بقولها:
"استفزني حبيت اهديه لكل اللي بيقولوا ماخلاص بقا اخدنا اللي عايزينه ... ياريت يعرفوا ليه مش عايز يمشي هو واللي حواليه
علشان ماتعرفوش تجمدوا كل ده زي بن علي واللي حواليه ... عرفتوا الاستماته ليه
حلال فينا مبارك ... يعيش حسني مبارك
اللي بكره يستخسر حتي الجزمة(اسفه مالقتش غير كده) يدينا بيها".
أما أحمد صاحب مدونة البتاعة، فيكتب عن بعض طرائف الشعب المصري خفيف الدم أثناء المظاهرات:
"نداء من الطلبة إلى الحكومة والثوار : ياريت متطولوش; كتاب التاريخ كبير لوحده ! والحكاية مش ناقصة !!!"
وتعليقا على موضوع الأجندة الخارجية:
"في إطار حملة التليفزيون المصري ضد الأجندات بلغنا أن قوات أمن الدولة ستهاجم الفجالة للعثور على أي أجندة ومصادرتها
- بيقولك لو عايز تشتم حد الأيام دي قوله : تصدق أنت طلعت واد أجندة وأي كلام !".
وهناك اقتراح باستحداث أفلام مصرية جديدة مأخوذة من أحداث الثورة:
"بما إننا بقينا جيل الثورة اقترح إننا نعيد إنتاج بعض الأفلام .. مثلا نعمل فيلم الرصاصة المطاطية لا تزال في جيبي .. عودة النت .. ليلة سقوط الداخلية ، أنا لا اختنق ولكني استغيث .. ايفنت هز عرش مصر .. أبي فوق الدبابة .. ليلة القبض على عز .. جاءنا الرئيس التالي .. نحن لا نرمى المولوتوف".
