"تحاربت بشكل كبير والوسط الفني مافيا كبيرة" بعد غياب طويل مقابلة حصرية لموقع البوابة مع النجمة دارين حدشيتي

منشور 21 آب / أغسطس 2019 - 12:30
دارين حدشيتي

حوار: صهيب الحديد

الساحة الفنية ما زالت تتذكر أعمالك الفنية القديمة، حتى آخر اصدارتك "بعدو الي" أبهر الجمهور، هل هنالك أعمال أو مشاريع جديدة ؟

 "آخر إصداراتي كانت أغنية "بعدو الي" و"قوم من وجي" وهدول الاغنيات من ألبومي لجديد بس تسربوا عالسوشال ميديا وصراحة اتفاجأت انه كيف تسربوا والحلو إنه انتشروا عالسوشال ميديا والناس حبتن واتفاعلوا معن، في مشاريع كتير حابة قدمها بس ناطرة الوقت المناسب".

ما نوع الأعمال التي تنوين تقديمها؟ هل هنالك ألوان غنائية جديدة؟

"كل أعمالي اللي قدمتها حمد لله نجحت وانتشرت بشكل كتير كبير لكل الناس من الأعمار الصغيرة والأعمار الكبيرة وأنا كفنانة دايمًا بسعى لقدم شي جديد عالساحة و مميز وبيشبهني. وأنا دايمًا بكل ألبوماتي بقدم كل الألوان الغنائية إن كان رومانسي أو شعبي أو فلوكلوري وأنا كفنانة  هيدا ملعبي بنجح فيه.. المفروض كل فنان عنده صوت لازم يأدي كل الألوان الغنائية وطبعا بإحساسه، وبدي ركز على شي أنا قدمت مشروع لكل بلد أغنية متل الكويت، قطر، فلسطين، تونس، لبنان، العراق، الأردن، مصر، وإن شاالله رح كمل بهيدا المشروع".

هل تعاقدتِ مع مدير أعمال جديد بعد وفاة مدير أعمالك السابق؟

"من وقت ما توفى الله يرحمه  مدير اعمالي استاذ جورج انستسيادس وان شاالله تكون روحه بالسما يارب، للصراحة اجتمعوا معي اشخاص عندن خبرة فنية وكزا منتج بس انا لليوم بعد ما لقيت الشي يللي بيناسبني وبناسب فني الراقي لأنه للأسف صاروا اليوم بيختاروا الفن الهابط - وفهمك كفاية - على أمل ان شاالله إنه لاقي الشخص المناسب يللي رح كمل معه مسيرتي الفنية اذا الله راد".

نعلم أنك تعرضتِ سابقا للمحاربة من شركات إنتاج لمصلحة فناناتها ، هل ما زالت دارين تحارب اليوم من قبلهم؟

"أنا كفنانة من اول ما ظهرت بسنة 2005 بألبوم "قدام الكل" تحاربت بشكل كتير كبير وكان يندفع مصاري كرمال يوقفولي اسمي ونجاحي عن الساحة الفنية.. الوسط الفني مافيا كبيرة وطبعاً أنا اليوم من بعد ما اتوفى مدير اعمالي استاذ جورج كتير في اشخاص انبسطوا انه أنا بعيده عن الساحة الفنية بس ما حداً بحل محل حداً وبالنهاية ما بصح إلا الصحيح والدليل انه بعدني لليوم عم بلمس هيدا الشي من محبة الناس الي من الفانز والجمهور بكل البلدان وعم يطالبوا اني ارجع".

نود التطرق إلى حياتك العاطفية، هل تعيش دارين قصة حب؟

" مين ما بيحب  وحلو الحب".

هل هناك أعمال فنية لفتت انتباهك مؤخرا؟

"في  أغاني عم حبها  وفي أغاني للاسف ما بعرف كيف عم يختاروها وعم بيكون عليها الانتاج كبير والاغاني ما بتستاهل".

أي فنانـ/ـة تتمنين تقديم ديو غنائي معه؟

"في كذا فنان وفنانة بحس انه نلبق لبعض كديو والأهم انه يكون ديو ناجح ويوصل لكل الوطن العربي".

بلد عربي تتمنين تقديم حفلة غنائية فيه؟

"صراحة ما فيني اختار بلد واحد انا كدارين بحب غني بكل البلدان لأن بكل بلد عندي جمهور فيه وبحب فني وأغانيي".

ماذا تقولين لل"فانز" الذين ينتظرونك؟

"قد ما قول وقد ما احكي مافيي عبرلن قديش انا بحبن وبدي اتشكر كل الفانز من كل قلبي على محبتهن لكبيرة الي وبعدن لليوم بيتواصلوا معي ليتطمنوا عليي ويعرفوا كل اخباري عبر السوشال ميديا على أمل وان شاالله إنه لاقي الشي اللي بناسبني تكون موجودة كرمال محبتن على الساحة الفنية".

للمزيد من قسم الترفيه اقرأ أيضًا:


© 2000 - 2022 البوابة (www.albawaba.com)

مواضيع ممكن أن تعجبك