عمره تجاوز السبعين غير انه ما زال بأوج قوته.
سالته مستفسراً: شو اخبارك يا ختيار.
رد : مهموم والله
قلت مستغرباً: من كان مثلك ينبغي ان يكون قد ودع الهموم.
قال زافراً: أوووف.. بنعيش وبنموت واحنا بالهم.
قلت: هات ما عندك.
قال: تعودت على زوجتي بعد عشرة عمر امتدت لاربعين عاماَ.. ثم توفت. فقعدت مثل القرد الوجيد على الشجرة
قلت: حاشاك.. طيب اتزوج
قال: شوف يا طويل العمر.. قررت فعلا اتزوج.. ورحت فتشت على بنت عشرين فما قبلت بي. وبنت ثلاثين برضه ما قبلت. وبنت اربعين كذلك. وخمسين شرحه.
فقلت بيني وبين حالي معقول اخذ بنت ستين..
لا .. بضل صايم احسن لي.
علقت بالقول: صح.
وضليت زي القرد على الشجرة..
قلت: حاشاك.
قال: وجاء النصيب ببنت في الخامسة والثلاثين.
كانت عانسا لم تتزوج من قبل،وقبلت بي.. كيف لا اعرف.
قلت: طيب.. انشاء الله انبسطت.
قال: هو انا بس انبسطت.. فرفحت. هاي صبية شفت على ايديها اللي ما شفتوش طوال اربعين سنة من الزواج. وأنت عارف يا حفيظ السلامة أن المرة زمان غير بنات هل ايام. فزوجتي الراحلة كانت تنام بالثوب وتصحى به. اما هذه.. فهي ترتدي فستاين النوم الشفافة، اللي كلها خفة ولطافة.
قلت: كويس يعني شفتلك يومين حلوين بعمرك
قال: ايوه شفت بس بعدين انهد حيلي.. وصرت خايف على مستقبلي.
قلت: يا رجل هو اللي بعمرك شو ضل فيه اله مستقبل.. انبسط واسكت.
قال متضائقاً: بالله.. اصلا انا بكمل محو امية وبدي اكمل تعليمي.. ومفكر اطلع مهندز علشان اهندز البلاد اللي مش عارفين المهندزين يهندزوها.
قلت: وشو علاقة الهندزة بمرتك.
قال: علاقتها اني بدأت اتعب.. وافكر طيب هاي عاشت 35 سنة منها 15 على الاقل بدون زوج، والان تزوجت.. وبكره لما..
قلت: ما تقول هيك.. ما زلت شيخ شباب.
قال: لا شيخ ولا بطيخ.. ووين هذا الشباب اللي بتحكي عنه.
يعني بكره ممكن تقولي طلقني يا بروح..
قلت: وبدكاش تطلقها..
قال: طبعا، انا احبها ولا اقدر ان اعيش بدونها.
قلت: حل مشكلتك بسيط اذا قالت لك يا بروح.. روح معها. هههههههه.
قال معنفاً: الله يلعنك شو واحد كرنيب.. لاقيلي حل يا بحل رقبتك..!
حاولت ان افهم الرجل العجوز ان حل مشكلته مش عندي.. يمكن عند د. فيل، أو عزائيل او.. لكنه بقي
مصرا على الامساك برقبتي بده حل.. والحل مش عندي.
* ابو علي
