بعد ما خلص العرس وانفض السامر، دار الحديث التالي بين معازيم:
وحدة: شفتي أهل العريس قديش مش كلاس..
الثانية: "فلجر" ع الاخر.
الاولى: ولا أمه وخواته يي شو شرشوحات.
الثانية: ولك ما بدهم حدا يرقص غيرهم ولابسين لبس كأنه من البالة
الأولى: أه شفتي.. بعدين شفتي ما اكثرهم.. العمى بدهم العرس الهم وبس. وشو هل زحمة.. الصالة املئت بجماعة العريس.
الثانية: أصلا العريس ما دخل مخي من الاول الله يعين نسايبه عليه.
الاولى: وبخيل كمان.. شفتي الشراب اللي قدموه، شكلهم جايبينه من سوق البسطات. ولك ما عمل حتى بوفيه.
الثانية ملوحة بيديها: ولا الكيك.. أي والله عيب عليهم.
الاولى: يا ريتنا ما رحنا
الثانية: معك حق.. شفتي بنت عم العريس اللي كبت العصير على فستاني.. أي والله فستاني اغلى من كل اواعيهم المشرشحة.
الاولى: أه تذكرتها.. شفتي كيف كانت ترقص.. شكلها بدها تلفت انتباه المعازيم.
الثانية: رقصها اباحي وبدها تلفت انتباه حتى العريس. سمعت انها كانت بتحبه.
الاولى: حبها برص.. معلش انا رايحة احكي للعروس عنها واخليها تدير بالها منها.
الثانية: اصلا العروس برقبة العريس واهله أي زي القمر.
في الجهة الاخرى دار حديث مشابه انما من زاوية اخرى:
الاولى: اففف شو هل عيلة اللي مناسبينها.. ولك شو هل عروس اللي اخذها.
الثانية: نفسي اعرف بس شو عجبه فيها.. لا شكلها حلو ولا شعرها حلو وضعيفه زي الحية.
الاولى: كله كوم وفستان العروس، أي شو هل زوق.
الثانية: زوق ايش.. أي هي هاي ناس بتعرف الزوق.
الاولى: والله خسارة فيهم هل تكاليف.. حفلة عرس بصالة وشراب وكيك، ابصر قديش كلفته "الاهبل".
الثانية: اه ما هم اشترطوا عليه هيك.
الأول: ويا ريتها عروس بتعبي العين أي انفضحنا قدام المعازيم، باهلها الشراشيح.
الثانية: أنا ما قهرني الا اخته هاي اللي نزلت خلع قدامه وسكرت الطريق عليه.
الأولى: مش اخوها..
الثانية: خوخة بعينها.. اصلا هيه بتعر.. وفستانها بعر وسحابه مفتوح وباين، وكل اهلها بعروا.
الاولى: يلا بدك يعرفوا انهم ناسبوا ناس "كلاس" ومحترمين.
الثانية: اكيد عرفوا.. احلى والله ما يعرفوش.
